María José Corvo Sánchez é profesora titular da Área de coñecemento de Alemán do Departamento de Filoloxía Inglesa, francesa e alemá da Universidade de Vigo, onde imparte a súa docencia na Facultade de Filoloxía e Tradución nos graos de Línguas Estranxeiras e de Filoloxía Aplicada Galega e Española.
Na súa investigación dedícase a diferentes disciplinas, lingüísticas e literarias, relacionadas coa lingua alemá de forma particular e co ensino e a aprendizaxe das línguas estranxeiras en xeral, desde unha perspectiva histórica predominantemente.
O seu interese polo ensino e pola aprendizaxe das línguas estranxeiras na historia comezou coa investigación desenvolvida para a sua tese doutoral sobre un mestre e intérprete de línguas español no territorio alemán nas primeiras décadas do século XVII e desde entón o gusto por esta liña de investigación non fixo máis que medrar.
Actualmente coordina o grupo de investigación “Ensino e Aprendizaxe de Linguas Estranxeiras. Historia e Presente” da Universidade de Vigo, o que lle permite traballar con outras compañeiras e outros compañeiros tanto desta universidade como doutras estranxeiras, con quen ten compartidos xa algunhos dos seus traballos publicados.
Algunhas das liñas de investigación manexadas e que tamén convidan a continuar no futuro baixo o título, poderiamos dicir, “Historia e presente do ensino e aprendizaxe de linguas estranxeiras” e relacionadas de forma multidisciplinar coa lingüística, a educación, a tradución e a literatura, ten que ver con:
- Aspectos lingüísticos
- Aspectos socioculturais
- Textos, libros, métodos e manuais
- Os léxicos de especialidade
- Autoaprendizaxe
- Literatura e Literatura infantil e xuvenil
- Literatura e cine