CHAMADA PÚBLICA DE ADSCRICIÓN AO INSTITUTO DE INVESTIGACIÓN LINGUA
(acordada na sesión do comité científico do 8/4/2025)
PREÁMBULO
O Instituto de investigación LINGUA (iLingua), con sede física na Facultade de Filoloxía e Tradución de Vigo, é un Instituto propio de carácter multidisciplinar cunha finalidade de investigación, innovación científica e transferencia de coñecemento no eido da lingüística e as linguas. As súas liñas de actuación inclúen: lingüística interna e variación lingüística; sociedade, ideoloxía e política lingüística; linguas, cognición e educación; tradución e interpretación; lingua e literatura; lingua e accesibilidade; humanidades dixitais.
Co iLingua, o persoal investigador da UVigo ten a oportunidade de optimizar a coordinación, mellorar indicadores de desempeño e aumentar a súa visibilidade internacional, acadar niveis sostibles de financiamento autonómico, estatal e internacional, así como optar a oportunidades de captación e atracción de recursos humanos asociadas a un centro constituído como unha contorna de investigación atractiva.
A política de incorporación ao iLingua baséase nun sistema de adscrición individual co obxectivo de abrir as portas a aquelas/es investigadoras/es da UVigo, de calquera ámbito científico, que desenvolvan liñas de traballo compatibles coa axenda científica do Instituto e que desexen integrarse nel.
PERSOAS CANDIDATAS ELIXIBLES E PROCESO DE ADSCRICIÓN
- PERSOAL DA UVIGO (Perfil 1)
O proceso de vinculación de persoal investigador da UVigo no iLingua está descrito no artigo 9 do Regulamento de réxime interno:
Artigo 9. Vinculación do persoal investigador
Inicialmente formará parte do iLingua o persoal mencionado na memoria de creación do mesmo. A vinculación dun/ha investigador/a ao iLingua poderá ter lugar á instancia da Comisión científica, do Consello asesor externo, da/o director/a ou da persoa interesada.
Trala súa creación, o iLingua fará unha convocatoria para a adscrición de novas/os investigadoras/es, aberta ao conxunto do profesorado e persoal investigador da UVigo.
Este proceso de vinculación diríxese ao persoal definido no artigo 5 do antedito Regulamento:
Artigo 5. Persoal integrante
Poderán ser membros do iLingua:
– investigadoras/as vinculadas/os: persoal docente e investigador doutor vinculado a tempo completo á UVigo (…)
– investigadoras/es non permanentes: persoal investigador contratado especificamente con cargo a programas ou a proxectos de investigación de acordo co marco laboral e normativo aplicable
– investigadoras/es en formación: persoal investigador matriculado en programas de doutoramento da UVigo que conte coa dirección ou coa codirección dun/ha investigador/a vinculada/o ao iLingua.
As características da integración están definidas no artigo 8:
Artigo 8. Dedicación do persoal investigador
O persoal investigador poderá estar vinculado formalmente a un só Instituto, entendéndose que a súa actividade investigadora e a súa produción científica (investigadora e de transferencia), aos efectos de filiación e valoración de indicadores, estará vinculada ao iLingua. Poderá visibilizarse a súa adscrición complementariamente a outras unidades académicas ou de investigación (Departamentos, grupos, Facultades, Escolas) ás que o persoal poida estar adscrito. (…).
O persoal investigador incorporado ao iLingua asumirá un compromiso de vinculación mínimo de tres anos.
- PERSOAL EXTERNO Á UVIGO (Perfil 2)
O proceso de vinculación de persoal investigador externo á UVigo no iLingua está descrito no artigo 6 do Regulamento de réxime interno:
Artigo 6. Persoas colaboradoras externas. O iLingua poderá colaborar con persoas externas relacionadas co ámbito de estudo do mesmo. As persoas colaboradoras externas non terán a condición de persoal integrante do iLingua.
Poderán pedir a vinculación como persoal colaborador externo as persoas cunha traxectoria investigadora consolidada vinculada significativamente aos proxectos e á actividade investigadora dos membros do iLingua.
PRESENTACIÓN DE SOLICITUDES
A data límite para a presentación de solicitudes é o 15 de outubro de 2025. As persoas solicitantes deberán cumprimentar o formulario en liña de expresión de interese (no Anexo pódense consultar os apartados que inclúe), no que se lle pedirá que cargue o seu curriculum vitae (en galego, español ou inglés), en calquera formato, preferentemente CVA (abreviado de 4 páxinas).
PROCESO DE AVALIACIÓN DAS SOLICITUDES
As solicitudes serán avaliadas pola Comisión científica, tralo informe previo do Consello asesor externo, atendendo a criterios de méritos de investigación e idoneidade, e respectando os principios de igualdade de oportunidades. As solicitudes aprobadas serán remitidas á Xunta directiva para a súa ratificación e serán comunicadas á Vicerreitoría de investigación da UVigo.
ANEXO. FORMULARIO DE EXPRESIÓN DE INTERESE
Deberá completarse en liña, a través do formulario (require autenticarse con conta Google): https://forms.gle/Z6sT9hecUKiSExkaA
DATOS PERSOAIS
- Apelidos, nome
- Código ORCID
- Correo electrónico
MODALIDADE DE ADHESIÓN
- membro do iLingua (perfil tipo 1)
- persoal colaborador externo (perfil tipo 2)
DATOS PROFESIONAIS
- Institución
- Departamento
- Área de coñecemento
- Facultade/Escola/Centro
- Categoría profesional actual
- Grupo de investigación
TRAXECTORIA INVESTIGADORA
- A súa categoría profesional permite/permitiu a solicitude de sexenios?
- Nº de sexenios de investigación acadados
- Acadou sexenio de transferencia?
- Nº de proxectos de investigación competitivos (autonómicos, estatais, estranxeiros, internacionais) dos que foi IP ou co-IP nos últimos 10 anos
- Nº de proxectos de investigación competitivos (autonómicos, estatais, estranxeiros, internacionais) nos que participou como membro do equipo investigador nos últimos 10 anos
- Nº de proxectos de investigación competitivos (autonómicos, estatais, estranxeiros, internacionais) nos que participou como membro do equipo de traballo nos últimos 10 anos
- Liderou ou formou parte de equipos que desenvolveran actividades de transferencia do coñecemento nos últimos 5 anos? Descríbaas brevemente.
- Resumo das súas achegas científico-técnicas máis relevantes nos últimos 10 anos (máx. 200 palabras; en galego, español ou inglés)
XUSTIFICACIÓN DA SOLICITUDE
- Motivación do seu desexo de integración no iLingua e xustificación da súa afinidade coas liñas de actuación principais (lingüística interna e variación lingüística; sociedade, ideoloxía e política lingüística; linguas, cognición e educación; tradución e interpretación; lingua e literatura; lingua e accesibilidade; humanidades dixitais); no caso do persoal externo á UVigo que solicite a súa adscrición como colaborador externo, xustificación do seu vínculo aos proxectos e á actividade investigadora dos membros do iLingua (máx. 200 palabras; en galego, español ou inglés)
- Carga do documento co curriculum vitae (en calquera formato, preferiblemente CVA abreviado; máx. 100 MB)